DILI—(Timorpost.com), Juiz Administradór Tribunal Distritál Dili (TDD), Afonso Carmona, afirma naran TDD sei troka ba Tribunal Judisiáriu Primeira Instánsia Dili (TJPID)
Carmona hatete, Tribunál Distritál Dili nee funsionál iha tinan 2000 ho regulamentu UNTAET nian númeru 11/2000 neebé fahe ba tribunal distritál sira ho tribunal rekursu.
Durante uza regulamentu UNTAET nee, uza naran Tribunal Distritál Dili, ne’ebé ho tempu naruk ona, tanba nee foin lalais sira iha ona planu hakarak troka naran Tribunal Distritál Dili (TDD) ba fali Tribunal Judisiáriu Primeira Instánsia Dili (TJPID).
Tuir lei númeru 25/2021 ne’ebé Parlamentu Nasionál aprova, kona-ba estatutu organizasaun judisiária nian, hodi muda naran TDD fali Tribunal Judisiáriu Primeira Instánsia Dili (TJPID).
“entaun ho ida nee, muda liafuan distritu nee sai fali Tribunal judisiáriu Primeira Instánsia”, Carmona informa ba Timor Post, iha knaar fatin TDD, Mandarin, Kuarta (01/03)
Tuir Carmona, lei estatutu organizasaun judisiária ne’ebé aprova iha tinan 2021, Tribunal Rekursu tenta halo mudansa iha títulu Tribunal Distritál Dili ba fali Tribunal Judisiáriu Primeira Instánsia Dili.
“tanba nee mak ohin Tribunal Rekursu enkontru ho Tribunal Distritál Dili, atu muda sistema neebé mak iha, tanba durante ita uza sistema eletróniku, entaun muda fali naran tau Tribunal Judisiáriu Primeiru Instánsia”, Nia afirma.
Nia hatete, bainhira naran nee muda, sidadaun sira neebé mak atu hatama karta ruma, tenke tau naran Tribunal Judisiáriu Primeira Instánsia.
“mudansa ida nee, tanba tribunal nia servisu mak aplika lei, entaun lei prevee ona tribunal tenke ser aplika, entaun ita komesa lao ona. Muda naran sira nee la signifika servisu mós muda hotu, servisu lao normal hanesan baibain”. Carmona dehan.
98 total views, 3 views today
