(Reportajen Estaziadu Mariano Abi/Asistente Editor Hermenegildo da Costa Tilman)
RAEOA (Timor Post)–Sekretáriu Rejionál Asuntu Saúde, Rejiaun Administrativu Espesiál Oekusi Ambenu (RAEOA), Manuel da Costa, hatete, implementasaun vasinasaun Pfizer ba estudante ho idade 12 to’o 18, agora daudaun atinje ona porsentu 5.62.
“Total labarik ne’ebé maka atu hetan vasinasaun Pfizer hamutuk 9708, tersetu ne’e ita foka ba iha eskola ne’ebé mak hamutuk 101 eskola, agora daudaun ita iha 5.62% ne’ebé mak ita nia oan sira, hanesan ha’u mensiona katak, husi idade 12 ano to’o 18 Ano,” nia dehan iha ninia knaar fatin Santa Roza, Sesta (22/04).
Nia hatete, atu aumenta tasa partisipasaun estudante sira, nia parte halo ona advokasia ho diretór eskola, profesór sira nune’e iha mós koñesimentu husi Diretór Edukasaun, Sekretáriu Rejional Edukasaun atu oinsá sira bele hatene kona-ba vasinasaun Pfizer.
“Ami husu kontinua ba Diretór Eskola sira no profesór sira, atu nafatin kontinua apoiu mobiliza no informa ita nia oan sira hodi bele partisipa másimu nafatin ba iha Vasinasaun Pfizer ne’e, ho ida ne’e ita bele atinji ita nia objetivu no ita nia oan mós hasa’e sira nia imunidade,” nia dehan.
Daudaun ne’e nia parte kontinua identifika ba iha labarik sira hotu no espera katak, iha fulan rua ou tolu hanesan ne’e, bele remata. (Lee Notísia Seluk Iha Jornál Timor Post/ Asesu You Tube Timor Post)
457 total views, 3 views today
